junun ki ek mukammal dastan malum hoti hai
meri hasti tamasha-e-jahan malum hoti hai

mohabbat ko ye duniya wajh-e-gham kahti hai kyon aakhir
mujhe to ye nashat-e-be-karan malum hoti hai

ek aisa waqt bhi aata hai dauran-e-mohabbat mein
dil-e-muztar ki har dhadkan fughan malum hoti hai

khuda shahid hai jis din se nigahen tum ne pherin hain
mujhe ye zindagi bar-e-garan malum hoti hai

khulus-o-mehr-o-ulfat jazba-e-isar kis mein hai
'ziya' ye baat waqt-e-imtihan malum hoti hai