justuju jab teri nahin hogi
meri manzil koi nahin hogi

main hun chhota to kya ye lazim hai
meri khwahish badi nahin hogi

yun to jugnu bhi hain hasin lekin
in se to raushni nahin hogi

koi chehra khila nahin lagta
dil mein shayad khushi nahin hogi

ab ke basti mein hai jo sannata
khatm ye khamushi nahin hogi

ab chalen dasht ko wahan shayad
itni be-raunaqi nahin hogi

khwab 'masud' kya wo dekhega
aankh jis ki lagi nahin hogi