kaam ek ye tere aashiq ne bada khub kiya
khun se likh ke rawana tujhe maktub kiya

ye bhi kya kam hai teri bazm ke har samea ne
mere sheron ko teri zat se mansub kiya

ek mere qatl pe wawaila munasib to nahin
shar-pasandon ne to isa ko bhi maslub kiya

jism phulon sa tha sine mein rakha tha patthar
hausla dekhiye main ne use mahbub kiya

kitne diwanon ko farzana kiya hai tu ne
kitne farzanon ko tujh ishq ne majzub kiya