kaam kuchh aa na saki rasm-e-shanasai bhi
shamil-e-bazm thi shayad meri tanhai bhi

kash tu apni talab mein kabhi pahunche mujh tak
tera hi aaina hai chashm-e-tamashai bhi

sahl mat samjho mere shauq ki nakaami ko
muft milti hai kahin izzat-e-ruswai bhi

chashm-e-be-khwab mein hai khwab ki surat ek shakhs
khud se ghafil bhi hai aur mahw-e-khud-arai bhi

khair main to isi qabil tha magar ye to bata
zindagi kya tu kisi ko kabhi ras aai bhi