kaam pada yaad aaya maula hai ye tarz-e-ibaadat kaisi nisbat jis ko maula se ho us ko hajat-wajat kaisi jab dil mein nahin masjud tere sab sajde hain be-sud tere ma'bud basa ho dil mein to sajde ki hai zahmat kaisi chahe gar tu us ki rahmat kar us ke bandon ki khidmat khilqat se hai nafrat gar to khaliq se hai raghbat kaisi baat teri ke hum ai wa'iz ho na sakenge qail hargiz duniya hi jab chhod chuke ho jannat ki phir hasrat kaisi mat bandon se kuchh mang bashar bande to hain aap gadagar tu maula ki bas kar 'ibaadat bandon ki hai itaat kaisi malik bhi wo raaziq bhi wo sare jag ka khaliq bhi wo us par hai tera takiya 'sada' phir ye fikr-e-uqubat kaisi