kab khazana talash karta hun
aab-o-dana talash karta hun

jis zamane ko hai talash meri
wo zamana talash karta hun

le ke dariya ko apni mutthi mein
koi pyasa talash karta hun

kaam-dhanda hai ab yahi mera
kaam-dhanda talash karta hun

tera chehra to har taraf paya
apna chehra talash karta hun

thak gaya hun talash kar kar ke
phir dobara talash karta hun

ek manzar hasin banaya hai
aankh wala talash karta hun

rakh ka dher hai mere aage
is mein shoala talash karta hun

'abdi' be-ghari ne mar diya
shab-basera talash karta hun