kabhi zamin na kahin aasman se niklega
hamara raaz kisi raaz-dan se niklega

wo ek ashk meri aaqibat sanwarega
shab-e-firaq jo chashm-e-ayan se niklega

mujhe khabar hai meri maut ka sabab mere dost
bas ek tir tumhaari kaman se niklega

main na-rasai se imkan khoj leta hun
mera yaqin bhi mere guman se niklega

jo bewafai se tabir kar raha hai mujhe
wo kam-shanas meri dastan se niklega

use nikala gaya tha bahisht se pahle
ab us ke baad ye aadam jahan se niklega

ab aur zabt karega to 'abdi' tera
shakeb aankh ke sail-e-rawan se niklega