kab ped ki manind thaharte hain musafir
suraj ko liye sath guzarte hain musafir

yun khauf-e-fasadat se chupka hai zamana
ab shahr mein aane se bhi darte hain musafir

tariki-e-shab kahkashan mang rahi hai
phir raat ke pahlu mein sanwarte hain musafir

ghar se to nikal aae hain jazbaat ki rau mein
nairangi-e-haalat se darte hain musafir

sahil ka tajassus hai junun-khez hai manzar
girdab mein hans hans ke utarte hain musafir

main ek samundar hun tah-e-ab mujhe dekh
mujh se hi guhar le ke ubharte hain musafir

himmat na kabhi haar na mayus ho 'khalid'
koshish ki badaulat hi sanwarte hain musafir