kab saba su-e-asiran-e-qafas aati hai
kab ye un tak khabar-e-amad-e-gul lati hai

dukhtar-e-raz ki hun sohbat ka mubashir kyunkar
abhi kam-sin hai bahut mard se sharmati hai

kyunki farba na nazar aawe teri zulf ki lat
jonk si ye to mera khun hi pi jati hai

jism ne ruh-e-rawan se ye kaha turbat mein
ab mujhe chhod ke tanha tu kahan jati hai

kya magar us ne suna shuhra-e-husn us gul ka
aankhen kohhaal se nargis bhi jo banwati hai

lakh hum sher kahen lakh ibarat likkhen
baat wo hai jo tere dil mein jagah pati hai

howe kis tarah dilerana wo aashiq se do-chaar
apne bhi aks se jo aankh ki sharmati hai

'mushafi' ko nahin kuchh wasf-e-izafi se to kaam
sher kahna zi-bas us ka sifat-e-zati hai