kab se baitha hun iltija ke liye
sun lo do baaten ab khuda ke liye

faiz-e-mashuq aashiqon ko kya
nikhat-e-zulf hai saba ke liye

na-tawani mein na-tawani hai
hath uthte nahin dua ke liye

khair hai kuchh to is mein jo chup hun
munh na khulwaiye khuda ke liye

kya dil-e-na-subur le jaun
nigah-e-sabr-azma ke liye

dar-e-jaanan ki khak hai iksir
dil-e-bimar ki shifa ke liye

sog mein dil ke dide phut rahe
aashna roe aashna ke liye

bhes badle hue raqib ka aaj
main chala arz-e-muddaa ke liye

is taghaful ki intiha hi nahin
koi had chahiye saza ke liye

wo bahut munfail hain dekho 'khayal'
chhodun shikwon ko ab khuda ke liye