pur-nur hai jahan mohabbat ke dagh se
raushan hai dair-o-kaba usi ek charagh se

bulbul ke nale aur bhi wahshat badhaenge
tafrih khak hogi mujhe sair-e-bagh se

kafi hai sarkhushi ko meri yaad-e-chashm-e-mast
mina se kuchh gharaz hai na matlab ayagh se

allah munimon ko bhi kya hi ghurur hai
lete hain ye salam bhi to kis dimagh se

duniya mein jis ne jitne kiye kam talluqat
utni hi us ne apni basar ki faragh se

dil de na koi kohkan aur qais ki tarah
aati hai roz-o-shab ye sada koh-o-ragh se

be bahs agar talash se hota husul-e-kaam
pa leta aab-e-khizr sikandar suragh se

hum rakh den us ke aage kaleja nikal kar
sun len khabar jo yar ke aane ki zagh se

furqat mein ranj-o-gham hai faraghat kahan 'khayal'
koson hai dur ye dil-e-mahzun faragh se