kab se ulajh rahe hain dam-e-wapsin se hum
do ashk ponchhne ko teri aastin se hum

hoga tumhaara nam hi unwan-e-har-waraq
auraq-e-zindagi ko ulat den kahin se hum

sang-e-dar-e-adu pe hamari jabin nahin
ye sajde kar rahe hain tumhaari jabin se hum

dohrai ja sakegi na ab dastan-e-ishq
kuchh wo kahin se bhul gae hain kahin se hum

'bismil' harim-e-husn mein hain kaam-yab-e-shauq
josh-e-shabab o rang-e-rukh-e-atishin se hum