kab use shokhi-e-raftar liye phirti hai
hawas-e-garmi-e-bazar liye phirti hai

dar-ba-dar khak-basar khwar liye phirti hai
kya kahen hasrat-e-didar liye phirti hai

charkh par apne chadhae hue duniya ki hawas
sainkadon kafir-o-din-dar liye phirti hai

zulf-e-mushkin ki na puchho wo bala hai wo bala
sainkadon sath shab-e-tar liye phirti hai

hashr mein rahmat-e-haq sab ki tasalli ke liye
sath 'shaghil' sa gunahgar liye phirti hai