kabhi baatil ko haq aur haq ko hum baatil samajhte hain
murad-e-ahl-e-dil ko sirf ahl-e-dil samajhte hain

dil-e-be-muddaa hi muddaa-e-zist hai apna
isi be-hasili ko zist ka hasil samajhte hain

ye tera nur wo tera makan dil kya nazar kya hai
nazar ko hum nazar samjhe na dil ko dil samajhte hain

kinaron par jo uthte hain wo tufan koi kya jaane
hamein to kam-nazar aasuda-e-sahil samajhte hain

yahi apna aqida hai koi kuchh bhi kahe hum to
ghazal kahna bhi kar-e-khair mein dakhil samajhte hain

jila mahsus hoti hai 'naim' aaina-e-dil par
kisi ki hum nigah-e-lutf ko shamil samajhte hain