kabhi jo main ne masarrat ka ehtimam kiya
bade tapak se gham ne mujhe salam kiya

hazar tark-e-talluq ka ehtimam kiya
magar jahan wo mile dil ne apna kaam kiya

zamane walon ke dar se utha na hath magar
nazar se us ne ba-sad mazarat salam kiya

kabhi hanse kabhi aahen bharin kabhi roe
ba-qadr-e-martaba har gham ka ehtiram kiya

hamare hisse ki mai kaam aae pyason ke
ze-rah-e-khair gunah-e-shikast-e-jam kiya

tulu-e-mahr se bhi ghar ki tirgi na ghati
ek aur shab kati ya main ne din tamam kiya

dua ye hai na hon gumrah ham-safar mere
'khumar' main ne to apna safar tamam kiya