kabhi main zikr karun din ki shadmani ka
fasana khatm to ho shab ki sargirani ka

simat ke aa gaya qadmon mein kis tarah sahra
suna tha shor bahut us ki be-karani ka

ajab nahin ki nae raste nikal aaen
kisi ne rasta roka hai bahte pani ka

tamam ahl-e-zaban baatilon ke haq mein hain
mujhe malal nahin apni be-zabani ka

jo baat kahni thi ab tak kahi nahin main ne
main ikhtitam karun kaise is kahani ka

khuda samajhta hai khud ko yahan jo aata hai
ajib haal hai 'alam' sara-e-fani ka