kabhi to ishq mein un ke sadaqat aa hi jaegi
kabhi to un ke dil mein meri chahat aa hi jaegi

abhi to mere arman khun ke aansu bahate hain
kabhi to dil ke un zakhmon ko rahat aa hi jaegi

mere gulshan ka har ek phul murjhaya hua sa hai
kabhi kaliyon ke lab par muskurahat aa hi jaegi

ye dar hai be-rukhi ka wo gila shikwa na kar baithen
kisi din un ke honton par shikayat aa hi jaegi

abhi wo aazmate hain unhen kuchh na kaho 'rizwi'
kisi din un ki chahat mein qayamat aa hi jaegi