kabhi ye zindagi achchhi-bhali bhi guzri thi
hamare honton se yani hansi bhi guzri thi

abhi sukut hai sehra hai dhul udti hai
inhin do aankhon se pahle nadi bhi guzri thi

tamam lafzon ki sargoshiyan sunin shab bhar
sadaen deti hui shairi bhi guzri thi

har ek rah mein har lahza dhundhta hun main
yahan se ishq ki sankri gali bhi guzri thi

mujhe hi baat nahin karni thi koi warna
mere qarib se kal zindagi bhi guzri thi

jahan pe zindagi baithi hai panw phaila kar
usi gali se kabhi khud-kushi bhi guzri thi

abhi to sirf guzarti hai mujh pe tanhai
kabhi mujhi se tumhaari kami bhi guzri thi