kade hain hijr ke lamhat us se kah dena
bikhar rahi hai meri zat us se kah dena

hawa-e-mausam-e-gham us ke shahr jae to
mere dukhon ki koi baat us se kah dena

ye wahshaten ye udasi ye ratjagon ke azab
usi ki hain ye inayat us se kah dena

wo dil ki bazi jahan mujh se jitna chahe
main man lunga wahin mat us se kah dena

wafa ki rah mein main aaj bhi akela hun
koi nahin hai mere sath us se kah dena

jahan pe adl ki zanjir nasb hai 'shahbaz'
wahin kate hain mere hat us se kah dena