kaf-e-ghubar mein malbus mera paikar tha
ye saneha to azal se mera muqaddar tha

har ek samt se mujh par hui thi barish-e-sang
zahe-nasib main apne makan ke andar tha

sukut-e-shab mein ye aawaz mujh ko di kis ne
wo raste ka musafir tha ya ki rahbar tha

usi ka aks raha aaine mein jalwa-fagan
wo apni zat ka shayad khud aaina-gar tha

tere jamal se thi zindagi mein ranai
mere wajud ka tu hi azal se mehwar tha

andheri raat mein saya bhi sath de na saka
nasheb-e-rah mein khud hi main apna rahbar tha

meri nazar mein baresham tha silk pairahan
guhar bhi mere liye raste ka patthar tha

mere safar ki 'saba' intiha yahi to nahin
qadam tha ret pe aur samne samundar tha