kaha aghyar ka haq mein mere manzur mat kijo
mujhe nazdik se apne kabhu tu dur mat kijo

hue sang-e-jafa se shisha-e-dil ke kai tukde
bas ab is se ziyaada aur chaknachur mat kijo

mere marham-guzar us shokh-e-be-parwa se ye kahiyo
ki zalim zakhm taza hai use nasur mat kijo

haqarat apne aashiq ki nahin mashuq ko bhati
'bayan' sai apni ruswai mein ta maqdur mat kijo

kaha tha sar-ban ke kan mein laila ne aahista
ki majnun ki kharabi ka kahin mazkur mat kijo