kahan dariya ki tughyani se nikla
talluq ret ka pani se nikla

kisi ki yaad ka kanta tha dil mein
bahut mushkil tha aasani se nikla

gareban chaak aawara pareshan
junun sahra ki virani se nikla

wo jis ka muntazir tha sang-e-dar bhi
wo sajda meri peshani se nikla

chamakte chand ka rishta bhi yaro
rukh-e-jaanan ki tabani se nikla

jo manzar misra-e-ula mein gum tha
wo manzar misra-e-sani se nikla

ilaj-e-dard-e-dil 'zishan' dekha
junun ki chaak-damani se nikla