kahan ke nam o nasab ilm kya fazilat kya
jahan-e-rizq mein tauqir-e-ahl-e-hajat kya

shikam ki aag liye phir rahi hai shahr-ba-shahr
sag-e-zamana hain hum kya hamari hijrat kya

dimashq-e-maslahat o kufa-e-nifaq ke bich
fughan-e-qafila-e-be-nawa ki qimat kya

maal-e-izzat-e-sadat-e-ishq dekh ke hum
badal gae to badalne pe itni hairat kya

qimar-khana-e-hasti mein ek bazi par
tamam umr laga di to phir shikayat kya

farogh-e-sanat-e-qad-awari ka mausam hai
subuk hue pe bhi nikla hai qadd-o-qamat kya