kahan ye os nahin aaftab ki zad mein
zamana aaj bhi hai inqalab ki zad mein

zuhur-e-zawiya-e-qaima se hai sabit
ye kaenat hai ilm-ul-hisab ki zad mein

agarche un ki tasalli mein hai yaqin shamil
dil-e-hazin hai magar iztirab ki zad mein

main apne nala-e-be-ikhtiyar ke qurban
jo naghma ban ke na aaya rabab ki zad mein

wo dasht jis mein ki dahshat hai be-karan 'saib'
wo dasht hai dil-e-wahshat-maab ki zad mein