kahin tha main mujhe hona kahin tha
main dariya tha magar sahra-nashin tha

shikast-o-rekht kaisi fath kaisi
ki jab koi muqabil hi nahin tha

mile the hum to mausam hans diye the
jahan jo bhi mila khandan-jabin tha

sawera tha shab-e-tira ke aage
jahan diwar thi rasta wahin tha

mili manzil kise kar-e-wafa mein
magar ye rasta kitna hasin tha

jilau mein tishnagi aankhon mein sahil
kahin sine mein sahra ja-guzin tha