kahta hai mera azm ki do-gam chala hun
aur panw ye kahte hain ki sadiyon ka thaka hun

manzil ka bharam mujh pe ayan ho gaya yaro
behtar hai palat jaun jahan se main chala hun

dastur-e-zamana mujhe apnaega kyun kar
main sar se utari hui bewa ki rida hun

sar dhup mein duniya ki chhupana nahin aasan
main qad mein har ek jism ke sae se bada hun

sau bar mera khun bahaya gaya nahaq
sau bar main ehsas ki suli pe chadha hun

ek umr mere dil ko ye gham yaad rahega
be-jurm tere shahar ke zindan mein raha hun

jis ghar ki bulandi pe mujhe naz tha 'kazim'
main aaj usi ghar ki bulandi se gira hun