kai dinon se murawwat nahin hui mujh se
use bhi koi shikayat nahin hui mujh se

bahut se kaam dikhawe ke kar raha tha main
khuda ka shukr ibaadat nahin hui mujh se

nae sire se mohabbat ki aarzu thi magar
nae sire se mohabbat nahin hui mujh se

ye log apne aqide se pyar karte hain
isi liye to aqidat nahin hui mujh se

main zimmedar hun teri udas aankhon ka
main manta hun hifazat nahin hui mujh se

tamam raat yunhi tiliyan jalata raha
diya jalane ki himmat nahin hui mujh se

ye aur baat tujhe darguzar kiya warna
kisi ke sath riayat nahin hui mujh se