kai jalwe teri pahchan ke dhoke se nikle hain
siyasat sainkadon chehre tere chehre se nikle hain

hamare daur ke bachche sabaq padhte hain chahat ka
kitabon ke bajae dil har ek baste se nikle hain

har ek bhai ki khwahish hai ki batwara ho ab ghar ka
abhi hum mulk ki taqsim ke sadme se nikle hain

idhar dekho yahan man hai udhar hai bap bachchon ka
zamane bhar ke sab rishte isi rishte se nikle hain

rasan tak koi jata hai koi maqtal talak 'hafiz'
jo raste husn walon ke hasin kuche se nikle hain