kaise in aankhon se dekhun mah-e-kaamil ki taraf
main ne dekha hai jamal-e-raunaq-e-dil ki taraf

dekh leta sirf apne khana-e-dil ki taraf
yunhi mail ho gaya tha qais mahmil ki taraf

main to mahw-e-be-khudi tha mujh ko kya malum hai
laya hai mera junun kyon teri mahfil ki taraf

dubne wale ki hasrat ka ye aalam dekhiye
phir nigah-e-yas pahunchi ahl-e-sahil ki taraf

aaj bimar-e-alam duniya se yun rukhsat hua
dam labon par tha magar aankhen thin qatil ki taraf

tujh ko is rangin-nigah-e-hashr-saman ki qasam
ek nigah-e-lutf-parwar bhi mere dil ki taraf

le chali be-tabi-e-dil aaj 'jauhar' khinch kar
us but-e-rangin-nazar zohra shamail ki taraf