kam kabhi rah ke aazar to hote honge
aabla-pai kahin khar to hote honge

mujh se ye soch ke wo mera pata puchhe tha
tang-daston ke bhi ghar-bar to hote honge

us se bichhda main andheron ka makin hun warna
koi ghar ho dar-o-diwar to hote honge

wo jahan bhi ho use dekh ke is shahr ke log
ku-ba-ku naqsh-ba-diwar to hote honge

marg jo apni tarah koi wahan ho ki na ho
log use dekh ke bimar to hote honge

be-gunah bhi tha nihattha bhi tha main ai qatil
qatl karne ke bhi meyar to hote honge