kanar-e-ab hawa jab bhi sansanati hai
nadi mein chupke se ek chikh dub jati hai

dikhai deti hain lashen hi lashen aangan mein
kahan se khud-kushi kar ke ye dhup aati hai

wo shai jo baithti hai chhup ke nange pedon mein
guzarte waqt bahut taliyan bajati hai

piyun sharab main dushman ke kasa-e-sar mein
ye buzdil aarzu kaisi hansi udati hai

'musawwir' us ko batate hain zaniya ye log
kuen mein apni jo sab nekiyan giraati hai