karun shikwa na kyun charkh-e-kuhan se
ki furqat dali tujh se gul-badan se

teri furqat ka ye sadma pada yar
zaban na-ashna ho gai sukhan se

dam-e-takfin bhi gar yar aawe
to niklen hath bahar ye kafan se

khila hai takhta-e-lala-jigar mein
hamein kya kaam ab sair-e-chaman se

na pahuncha gosh tak ek tere haihat
hazaron nala nikla is dahan se

dimagh-e-jaan mein hai ye bu-e-kakul
ki nafrat ho gai mushk-e-khutan se

jigar par lakh teshe gham ke nit hain
rahi nisbat hamein kya kohkan se

'surur' aata hai jab wo yaad-dilbar
to jaan bas meri ho jati hai san se