kashish-e-husn ki ye anjuman-arai hai
sari duniya tere kuche mein simat aai hai

dard ne khoe hue dil ki jagah pai hai
ek bala sar se gai ek bala aai hai

jaan nisaron ko sahaara jo na jine ka mila
ku-e-qatil mein qaza khinch ke le aai hai

main chhupata hun gham-e-ishq to banta nahin kaam
aur kahta hun to goya meri ruswai hai

jigar o dil mein taraazu na ho kyun nawak-e-naz
is ko donon se barabar ki shanasai hai

dil ye kahta hai wahan ja ke sambhal jaunga
main ye kahta hun ki bad-bakht ki maut aai hai

ban ke naseh wo ye kahte hain mohabbat na karo
mujh ko marne nahin dete ye masihai hai

sab jise dagh-e-dil o zakhm-e-jigar kahte hain
wo mere nakhun-e-gham ki chaman-arai hai

kya hai duniya mein numud aur numaish ke siwa
zindagi hum ko tamashe ke liye lai hai

ishq ruswa-kun-e-alam wo hai 'ahsan' jis se
nek-namon ki bhi bad-nami o ruswai hai