kashti-e-mai ko tasawwur mein rawan rakhte hain
jeb khali hai magar dil to jawan rakhte hain

hum ki mahrum hain didar-e-khudawandi se
chashm-e-zahir to ba-har-su nigaran rakhte hain

khanqahon se talluq hai na darbaron se
nisbat-e-silsila-e-zulf-e-butan rakhte hain

jhuk hi jata hai falak aankh jahan padti hai
chum leti hai zamin panw jahan rakhte hain

hum se aabaad hai mai-khana-e-hasti yani
dil ko rakhte hain subuk-sar ko garan rakhte hain