kat na pae ye fasle bhi agar
aur us par ye rabte bhi agar

jo tumhaari taraf nahin khulte
band nikle wo raste bhi agar

khair ho teri be-niyazi ki
ab nahin khud-parast the bhi agar

kya karenge siwae khwahish ke
mohlat-e-yak-nafs mile bhi agar

umr bhar ke ziyan ka mol nahin
chand lamhe chura liye bhi agar

khun-baha kaun dega jazbon ka
baad marne ke ji uthe bhi agar

kaun samjhega istiaron ko
kuchh na bolenge hashiye bhi agar