kati hai umr hamari bade azab ke sath
tumhaari yaad ke aansu piye sharab ke sath

jo aasman se utri hai rahbari ke liye
wafaen ki hain kabhi tum ne us kitab ke sath

isi liye to jawani mein sar jhuka ki tera
shabab-e-husn bhi shamil rahe sawab ke sath

chamakne wali kisi shai ka eatibar nahin
diya to hum bhi jalate hain mahtab ke sath

hamari aankh ke parde bhi ba-haya honge
nazar uthe to nazar aaen sab hijab ke sath

bani hai jashn-e-bahaaran mein qatl-e-gul ki faza
hamein bhi rahna padega bade hisab ke sath