kati nahin to har taraf phailegi shakh jabr ki
sabr ki baat chhodiye hoti hai had bhi sabr ki

dhund ab aisi sarzamin jis ki tamam khetiyan
mangen na aasman se bhik kabhi bhi abr ki

karb ka bahr-e-bekaran chaaron taraf hai maujzan
ghar mein ghadi muqim hai kab se azab-e-qabr ki

pahle to ghar ke sahn mein dhup ki barchhiyan girin
baad mein chhat pe aa gai fauj ghanim-e-abr ki

bhik mein le ke juraten aae to panw jhad gae
phand sake na is liye log fasil jabr ki

rah-e-murad is liye aur bhi dur ho gai
us mein tha qaht-e-hausla mujh mein kami thi sabr ki

sahn mein phul phul jism khel rahe hain har taraf
khauf nahin hai dhup ka fikr nahin hai abr ki