kaun duniya se baada-khwar utha
chashm-e-tar abr-e-nau-bahaar utha

kha ke ghash gir pade khade baithe
baith kar is ada se yar utha

aatish-e-ishq dekh kar malik
al-aman al-aman pukar utha

dard tazim-e-marg ko dil mein
shab-e-furqat hazar bar utha

jite-ji daur-e-asmani mein
na zamin se ye khaksar utha

abr-e-rahmat ne de diya chhinta
baad marne ke jab ghubar utha

wahshat-e-dil ne phir nikale panw
phir tahammul ka ikhtiyar utha

phir junun fasl-e-gul mein laya rang
phir main hone ko sharmsar utha

haal-e-'bimar' ja-e-riqqat hai
marham-e-dil ka e'tibar utha

chor zakhm-e-jigar mein baith gaya
chaaragar ho ke sharmsar utha