kaun haq pe hai kaun baatil hai
faisla ye bada hi mushkil hai

ru-e-taban tumhaara kaamil hai
aaina kab tumhaare qabil hai

kitni bechainiyan samete hue
kitni khamosh mauj-e-sahil hai

meri turbat pe aa ke rota hai
kaisa zalim ye mera qatil hai

ab charaghon pe bas nahin chalta
kaun aandhi ke ab muqabil hai

jis ko main ne masiha samjha tha
aazma kar mujhe wo qail hai

'shad' mano ya phir nahin mano
maut hi zindagi ki manzil hai