mera junun meri firasat ke samne
saya-fagan bana hai tamazat ke samne

auqat kya bataun tumhein is jahan ki
turfa-tamasha hai meri wahshat ke samne

hum ne khuda ki rah mein sar tak kata diya
jhukna kiya qubul na zulmat ke samne

sar par sadaqaton ke hasin taj hain magar
mujrim hamin bane hain adalat ke samne

mahbubiyat wafa ki haqiqat hai dosto
duniya jhuki hui hai mohabbat ke samne

khamosh kyon hain tere lab-e-arzu ai 'shad'
bechain dhadkanon ki samaat ke samne