kaun si shai mein tera nur nahin
kis jagah par tera zuhur nahin

dil se aati hai ye sada paiham
pas tere hun tujh se dur nahin

dil-e-wahshi ne the qadam chume
is mein koi mera qusur nahin

khak ho kar ghubar-e-rah bano
nakhwat-o-kibr kuchh zarur nahin

jalwa dikhla de shah-e-din mujh ko
tere lutf-o-karam se dur nahin

jalwa-e-nur se jala tha koh
dil makan-e-khuda hai tur nahin

ai 'jamila' gunah ka kya dhadka
nam is ka magar ghafur nahin