kaunsi chiz hai jo puri hai
zindagi aaj bhi adhuri hai

nekiyan kar ke sochna kaisa
koi badla mile zaruri hai

kaamyabi ka raaz batlaun
awwalin shart ji-huzuri hai

hum ne kate hain din qayamat ke
gham ki ye raat bhi uburi hai

wahi be-iltifati-e-jaanan
wahi iza-e-na-suburi hai

khak hun phir bhi sharmsar nahin
ek gosha to dil ka nuri hai

dil ko aksar kachokta hai 'zafar'
koi ehsas-e-la-shuuri hai