khar-o-khas phenke chaman ke raste jari kare
baghban fasl-e-bahaar aane ki tayyari kare

dil jigar ki ya jigar dil ki aza-dari kare
ek hi aalam hai kis ki kaun gham-khwari kare

mere dard-e-ishq se iza hai sari khalq ko
maut behtar hai jab itna tul bimari kare

naza ho lekin na sar ke kucha-e-mahbub se
lakh ho behosh par itni tu hushyari kare

shaare-e-ulfat ne likkha hai kitab-e-ishq mein
wasl ho ya hijr sari raat bedari kare

ai junun be-sakhta hai aafiyat madd-e-nazar
aisa aalam ho ki aalam is se be-zari kare

tere jis pahlu mein baithe dil jigar hain shad shad
uth gae kah kar koi kis ki taraf-dari kare

ishq galiyon mein phire lekin na ho parda-dari
husn parde mein rahe aur garm bazari kare