khak atraf mein udti hai bahut pani de
is masafat ko bhi ek khitta-e-barani de

kuchh dinon dasht bhi aabaad hua chahta hai
kuchh dinon ke liye ab shahr ko virani de

ya mujhe mamlikat-e-ishq ki shahi se nawaz
ya mujhe phir se wahi be-sar-o-samani de

meri danai ne rakkha na kahin ka mujh ko
mere maula tu mujhe phir wahi nadani de

ab kahani ko bhi uljha zara afsana-taraaz
shauq kuchh aur badha aankh ko hairani de