khalwat mein khayalon ki ye anjuman-arai
aabaad hai ab kitna virana-e-tanhai

aise bhi marahil kuchh aae rah-e-hasti mein
mahsus hua manzil khud pas chali aai

tu sham-e-masarrat hai gham-khana-e-imkan mein
dam se tere qaem hai har bazm ki ranai

hai yaad teri kya kya mail-ba-karam mujh par
guzre hue lamhon ko jo sath liye aai

pighle hue sone se ubhrin kai taswiren
dariya ke kinaron par jab dhup utar aai

is gulshan-e-hasti ka har rang nirala hai
jab rone lagi shabnam phulon ko hansi aai