khatm jis din shorish-e-ah-o-fughan ho jaegi
zindagi insan par bar-e-garan ho jaegi

quwwat-e-ehsas agar sarf-e-fughan ho jaegi
naqsh-e-faryaadi meri umr-e-rawan ho jaegi

gar yahi diwangi hai rahrawan-e-ishq ki
manzil-e-maqsud gard-e-karwan ho jaegi

aaj sajdon ki farawani se hota hai guman
khud jabin-e-shauq tera aastan ho jaegi

jo shab-e-furqat giregi dida-ha-e-shauq se
wo lahu ki bund bahr-e-be-karan ho jaegi

gulistan par bijliyon ki yurishen hone to do
har kali sehn-e-chaman ki aashiyan ho jaegi

baada-noshi mein agar husn-e-aqidat hai sharik
bazm-e-saqi sajda-gah-e-do-jahan ho jaegi