khayal-e-tark-e-talluq ko talte rahiye
hawa mein koi hayula uchhaalte rahiye

purane aashna chehron ko yaad kar kar ke
hujum-e-gham mein bhi dil ko sambhaalte rahiye

tamam umr yunhi kije hasraton ka shumar
tamam umr yunhi dukh sambhaalte rahiye

saja ke roz nai mahfilen nae chehre
zar-e-fasurda-dili ko ujalte rahiye

rahen na dasht jo sahra-nawardiyon ke liye
to apne sahn mein patthar uchhaalte rahiye

na mil saken jo wo yaran-e-gul-sifat 'nahid'
to apne aap ko sanchon mein dhaalte rahiye