khayal-o-khwab ki ab rahguzar mein rahta hai
ajib shakhs hai aksar safar mein rahta hai

kisi ka dekhna mud kar wo chashm-e-tar se mujhe
hamesha ab wahi manzar nazar mein rahta hai

tamam raste mud kar yahin pahunchte hain
wo is khayal se ab apne ghar mein rahta hai

masarraton ke kinare to dub jate hain
safina dil ka ghamon ke bhanwar mein rahta hai

kahan hai kaise bataen yahi samajh lije
'shakil' ab to kisi chashm-e-tar mein rahta hai