khayal-o-khwab mein kab tak ye guftugu hogi
uthao jam ki ab baat ru-ba-ru hogi

abhi hun pas to wo ajnabi se baithe hain
main uth gaya to bahut meri justuju hogi

mujhe batao to kuchh kaam aa sakun shayad
tumhaare dil mein bhi ek fasl-e-arzu hogi

tujhi ko dhundhta phirta tha dar-ba-dar phir bhi
mujhe yaqin tha ruswai ku-ba-ku hogi

badal gaya bhi agar wo to dekhne mein 'naim'
wahi libas wahi shakl hu-ba-hu hogi