khayal-o-khwab se niklun zuhur tak dekhun
safar ke daere todun ubur tak dekhun

mere liye hain ye haft-asman-o-haft-zamin
to kis liye tere jalwe main tur tak dekhun

samajh saka hun tujhe bas shuur ki had tak
ye fikr hai ki tujhe la-shuur tak dekhun

ragen chatakh gain rishton ki shorishen kaisi
sada lahu ki jo aae to dur tak dekhun

ulajh na jaun kahin reshmi khayalon mein
tera 'jamal' pas-e-rang-o-nur tak dekhun